Guantánamo. Herferð gegn mannréttindum

Delta-búðirnar við Guantánamo-flóa á Kúbu eru umdeildasta fangelsi í heiminum. Enn sitja þar um 600 fangar án dóms og laga, réttindalausir með öllu. Eru þetta harðsvíruðustu hryðjuverkamenn al-Kaída eins og Bush-stjórnin heldur fram? Og hefur fangelsun þeirra reynst árangursrík í stríðinu gegn hryðjuverkum, komið í veg fyrir frekari ódæði og aflað mikilvægra upplýsinga?

David Rose leitast við að svara þessum spurningum í bókinni. Hann heimsótti búðirnar á síðasta ári og tók viðtöl við fangaverði, hjúkrunarfólk og annað starfsfólk, m.a. fangelsisstjórann. Hann lýsir í bókinni hinu kæfandi andrúmslofti sem þar ríkir, sífelldum árásum á fanga, og andlegu og líkamlegu harðræði. Í Guantánamo er margra alda gömlum hugmyndum um meðferð fanga varpað fyrir róða sem sýnir okkur að í stríðinu gegn hryðjuverkum verða mannréttindi fyrst til að hverfa.

Sláandi greinargerð um kerfisbundnar pyntingar á 600 föngum, þar sem kastljósinu er beint að vafasömu gildi hinna „gríðarlega mikilvægu upplýsinga“ sem „uppskornar“ hafa verið.
– Scotland on Sunday, 31. okt. 2004

Með Guantánamo hefur David Rose sent frá sér ádeilu sem byggir á ítarlegum rannsóknum. Hann er rekinn áfram af reiðiþrunginni réttlætiskennd án þess þó að það hafi áhrif á efnistök … Rose á svo sannarlega skilið að bók hans
sé lesin.
– San Francisco Chronicle, 21. nóv. 2004

Í hinni áhrifamiklu bók, Guantánamo – Herferð gegn hryðjuverkum, eftir blaðamanninn David Rose, kemur berlega í ljós hvaða brot Bush og Blair fremja um þessar mundir.
– The Independent

Af öllum þeim bókum sem ég hef mælt með á þessu ári er Guantánamo sú mikilvægasta. Þú verður að lesa hana. Svo einfalt er það.
– The Guardian, 30. okt. 2004

Glögg og yfirgripsmikil úttekt. Ískaldur áfellisdómur yfir ríkisstjórn Bandaríkjanna.
– Harold Pinter

Heimasíða Davids

166 bls. | 145 x 215 mm | 2004 | ISBN 9979-772-40-9