Eins og skot. Handbók um skotfæri, hleðslu þeirra, meðferð og virkni

Böðvar Bjarki Þorsteinsson (Höfundur)

Í þessari bók er fjallað um skotfæri, samsetningu þeirra og virkni. Hér er að finna, í fáeinum dráttum, þróunarsögu skotfæra í gegn um aldirnar. Fjallað er ýtarlega um patrónur, hvellhettur, púður og byssukúlur og val á þeim út frá fyrirhugaðri notkun.

Í framhaldi af því er farið nákvæmlega yfir það hvernig þessum hlutum er raðað saman þannig að úr verði fullbúin og örugg skotfæri. Tækjakosti til þess verks er gerð góð skil. Sagt er frá því hvernig meta skal gæði skotfæranna og kalla fram nákvæmni og hittni.

Að lokum er tæpt á helstu skotfræðiþáttum sem snerta skotmenn helst sem og hvað hafa þarf í huga þegar þrýstingur og öryggi eru annars vegar.
Hér er á ferðinni margvíslegur fróðleikur bæði fyrir byrjendur og lengra komna þar sem fjallað er ítarlegar um efnið en fram að þessu hefur verið gert á íslensku máli.

Böðvar B. Þorsteinsson vann við kennslu og skólastjórn um langt árabil en vinnur nú við skipstjórn á millilandaskipum. Hann hefur frá unglingsárum stundað skotmennsku og í áratugi grúskað í þeim fræðum sem efni þessarar bókar nær til.

550 bls. | 238 x 194 | 2018 | ISBN 978-9935-458-78-0