Sveppabókin

Description

Sveppabókin er frumsmíð um sveppafræði á íslensku og byggist m.a. á hálfrar aldar rannsóknum höfundar á sveppum.

 

Í fyrri hluta bókarinnar er fjallað um eðli og gerð sveppa og hlutverk þeirra í lífkerfi jarðar, m.a. um sníkjusveppi, svepprætur, samkipti sveppa og dýra og sveppasprettu á Íslandi. Sagt er frá viðhorfi manna til sveppa og rakin saga svepparannsókna, sérstaklega á Íslandi. Þá er rætt um matsveppi og eitursveppi og nýtingu myglusveppa.

 

Í síðari hluta er fjallað um alla flokka sveppa sem þekkjast á Íslandi. Um 700 tegundum er lýst, þar af um 300 ýtarlega, en alls er getið meira en 1000 tegunda. Litmyndir eru af um 540 tegundum. Alls eru um 640 litmyndir í bókinni, þar af 35
heilsíðumyndir, auk þess um 150 teikningar og svarthvítar myndir.

 

Allir íslenskir matsveppir fá ýtarlega umfjöllun í bókinni, svo og nokkrir vel þekktir erlendir matsveppir og eitursveppir.

 

Bókin hlaut Íslensku bókmenntaverðlaunin árið 2010.

 

Í þessari nýju og breyttu útgáfu er viðauki eftir Guðríði Gyðu Eyjólfsdóttur um myglusveppi innanhúss.