04. nóv. 2009
Tvær nýjar skáldsögur
Út er komin ný bók eftir Ólaf Hauk Símonarson, Fuglalíf á Framnesvegi og er hún sjálfstætt framhald Flugu á vegg sem kom út í fyrra. Hér heldur Ólafur Haukur áfram að rekja uppvaxtarsögu drengsins í Vesturbænum á sinn hugljúfa og gamansama hátt. Þá er einnig komin út ný bók eftir Elías Snæland Jónsson, Rúnagaldur, hörkuspennandi sögu þar sem fléttast saman arfur nasismans, norræn goðafræði og íslenskur veruleiki. Magnaður skáldskapur!
04. nóv. 2009
Flosi er á fleygiferð
Bók Flosa heitins Ólafssonar, Í Kvosinni, situr nú í öðru sæti í flokki ævisagna og í sjöunda sæti yfir allar seldar bækur í Eymundsson. Það þarf í sjálfu sér ekki að koma á óvart því bókin er hreint út sagt frábær skemmtun. Flosi rifjar hér upp ýmis spaugileg atvik úr æsku sinni og raunar fram á fullorðinsár. Eins og venjulega er Flosa ekkert heilagt og skýtur örvum sínum í allar áttir.
03. nóv. 2009
Nýjar ævisögur
Það liggur í loftinu er saga Birnu Óladóttur og Dagbjarts Einarssonar útgerðarmanns í Grindavík eftir Jónas Jónasson útvarpsmann. Í bókinni rekur Jónas Jónasson sögu þeirra. Bókin er opinská enda eru Birna og Dagbjartur hrein og bein og óhrædd við að segja frá viðkvæmum einkamálum sínum.
En bókin er ekki síður saga dugmikils fólks sem með áræðni og vinnusemi byggði upp öflugt fyrirtæki og getur með stolti litið yfir farinn veg.
Þá er komin út bókin Þjófur, fíkill, falsari – Sjálfsævisaga síbrotamanns eftir Guðberg Guðmundsson. Hann hóf ungur afbrotaferil sinn, var fyrst dæmdur á Litla Hraun aðeins sautján ára og sat samtals í fangelsum í yfir 20 ár á Íslandi og víða erlendis áður en hann sneri við blaðinu. Höfundur er sérlega berorður um eigið líf og mannlýsingar eru beinskeyttar og óvægnar, hvort sem hann fjallar um samferðamenn sína á glæpabrautinni eða aðra þá sem hann átti samskipti við.
Bókin er í senn raunsönn lýsing á hlutskipti þeirra sem lenda upp á kant við samfélagið og jafnframt einstök frásögn af íslenskum undirheimum.
28. okt. 2009
Í Kvosinni komin út
Bók Flosa heitins Ólafssonar, Í Kvosinni, er komin út en hún var endurútgefin í tilefni 80 ára afmælis hans sem var 27. október.
Flosi Ólafsson var einn ástsælasti leikari þjóðarinnar í áratugi en var jafnframt afkastamikill rithöfundur og þýðandi. Hann var leiftrandi húmoristi og er þessi bók skýr vottur um það. Hér fer Flosi á kostum um æsku sína í miðbæ Reykjavíkur, ýmis dægurmál, baráttuna við skriffinnskubáknið o.fl.
17. nóv. 2008
Síðustu bækurnar komnar í verslanir
Síðustu bækurnar sem koma út hjá Skruddu þetta árið fóru í verslanir um helgina. Þar af eru fjórar eftir íslenska höfunda. Gunnar Gunnarsson fréttamaður hjá RÚV og margreyndur glæpasagnahöfundur kemur nú með nýja bók eftir langt hlé. Hún heitir AF MÉR ER ÞAÐ HELST AÐ FRÉTTA ... og fjallar um fréttamann sem hefur steypt sér í botnlausar skuldir og leitar allra leiða til að leysa vandann. Hörkuspennandi saga um glæframenni og glæpi þeirra. Níels Rúnar Gíslason er ungur höfundur sem hefur ritað ævisögu Dags Sigurðarsonar skálds, GOTT Á PAKKIÐ. Þetta er krassandi bók um einn umdeildasta listamann Íslendinga á síðustu öld. ÓÐUR TIL STEINSINS er sérlega athyglisverð bók eftir Aldísi B. Björnsdóttur sem geymir áhrifamiklar frásagnir íslenskra kvenna af örlagaríkum atburðum í lífi þeirra. Loks er komin út skemmtileg ævintýrabók handa börnum eftir mæðgurnar Guðnýju S. Sigurðardóttur og Júlíu Guðmundsdóttir sem heitir MILLI TVEGGJA HEIMA og fjallar um samskipti manna og álfa.
20. okt. 2008
Alkasamfélagið á topp 10
Bók Orra Harðarsonar, Alkasamfélagið, fór beint inn á metsölulista Eymundsson þegar hún kom út í byrjun október. Í síðustu viku bætti hún um betur og fór inn á aðallistann yfir 10 söluhæstu bækurnar. Þá er einnig augljóst á bloggi síðustu vikna að bókin hefur vakið mikla athygli.
Litla stúlkan og sígarettan eftir franska rithöfundinn Benoit Duteurtre fékk frábæra dóma í Kiljunni þann 8. okt. síðastliðinn og fór í kjölfarið beint í 5. sæti á skáldverkalista Eymundsson. Þá hefur ljóðabók Ingimars Erlends, Hvíta kista, setið á sama lista í tvær vikur.
05. okt. 2008
Alkasamfélagið
Bók Orra Harðarsonar, Alkasamfélagið, fór í verslanir á föstudaginn. Hennar hefur verið beðið með talsverðri eftirvæntingu. Í sunnudagsblaði Mbl. er ítarlegt viðtal við Orra þar sem hann fjallar um bókina, meðferðarbransann, AA-samtökin og um baráttu sína við Bakkus.
26. sep. 2008
Nýjar bækur
Í dag koma út tvær nýjar bækur frá Skruddu, skáldsagan Litla stúlkan og sígarettan eftir franska rithöfundinn Benoit Duteurtre. Hann hefur vakið mikla athygli á síðustu árum og er um þessar mundir talinn einn af athyglisverðustu höfundum Frakka. Litla stúlkan og sígarettan hefur átt stóran þátt í að vekja athygli á Duteurtre og hefur bókin þegar verið þýdd á yfir 20 tungumál. Friðrik Rafnsson þýddi bókina.
Þá kemur einnig út merkileg bók handa skólum og foreldrum sem heitir Til fyrirmyndar –heildstæður stuðningur við jákvæða hegðun eftir Jeff Sprague og Annemieke Golly í þýðingu Reynis Harðarsonar. Þessi bók fjallar um hvernig bæta má aga og þar með námsárangur í skólum með tiltölulega einföldum aðferðum.
Í næstu viku kemur út bókin Alkasamfélagið eftir Orra Harðarson og hefur hún þegar vakið óskipta athygli enda þótt hún sé enn ekki komin út! Sérlega athyglisverð bók um alkóhólisma, áfengismeðferð, AA-samtökin og þær leiðir sem íslenskum alkóhólistum bjóðast til að ná tökum á vanda sínum.
Loks kemur í næstu viku merkileg ljóðabók eftir Ingimar Erlend Sigurðsson sem nefnist Hvítakista. Mögnuð ljóðabók um ástina, dauðann og trúna og ríkulega myndskreytt af höfundi.
02. sep. 2008
Ný bók um ofvirkni og athyglisbrest
Út er komin bókin Lærðu að hægja á og fylgjast með eftir Kathleen G. Nadeau og Ellen B. Dixon í þýðingu Gyðu Haraldsdóttur sálfræðings. Bókin kemur út í tengslum við Afmælisráðstefnu ADHD samtakanna sem haldin verður nú í september. Hún er sérstaklega ætluð börnum sem glíma við erfiðleika sem tengjast athyglisbresti og ofvirkni. Bókinni er ætlað að vera nokkurs konar sjálfshjálpartæki fyrir börn á grunnskólaaldri og inniheldur aðgengilegar upplýsingar, góð ráð, leiðbeiningar og hvatningu sem gagnast við að takast á við daglegt líf á árangursríkan hátt.
Efni bókarinnar miðast fyrst og fremst við þarfir barnanna sjálfra og er skrifað út frá þeirra sjónarhorni, en hún einnig ómissandi fyrir foreldra, kennara og aðra sem tengjast börnum sem eru hvatvís og eiga í bágt með einbeitingu og úthald. ADHD samtökin og Janssen-Cilag styrkja útgáfu bókarinnar.
28. maí 2008
Hvað er sagnfræði? – Ný bók
Í dag kom út bókin Hvað er sagnfræði? – Rannsóknir og miðlun í ritstjórn Guðna Th. Jóhannessonar og Guðbrands Benediktssonar. Í ritinu birtast flestir þeirra 18 fyrirlestra sem fluttir voru á hádegisfundum Sagnfræðingafélagsins veturinn 2006-2007. Ritinu er ætlað að veita innsýn í stöðu íslenskrar sagnfræði við upphaf nýrrar aldar og vekja umræður um ýmsar meginspurningar sem snúa að sagnfræðilegum rannsóknum og miðlun sögulegrar þekkingar.
Bókin er gefin út í samvinnu við Sagnfræðingafélag Íslands.